By Bankerda Chyne
Ka shnong Nohron ka long ka wei ka shnong ha thaiñ Mawkynrew kaba la shim khia ia kane ka khlam COVID-19. Ka Dorbar Shnong lem bad U Sordar ki la shong meeting kyrkieh ban phylliew jingmut kumno ban pyntreikam ia ki kyndon ka Sorkar ban iada na une u khñiang jingpang. Ka sien jam kaba nyngkong kaba ki shim ka long ba ki jied ia ki 30 ngut ki samla ban long volunteer ha shnong. Kine ki samla ki don hapdeng ka rta 22 haduh 30 snem. Ki phiah ia kine ki volunteer kumba 5-6 ngut ha man ka dong ban peit bad khmih ba ki nongshnong kin bud ryntih ia ki kyndon. Ban kloi ka jingphah khubor, kane ka kynhun ka don da ka WhatsApp group ruh bad ki ai kyrteng ia ka kynhun da ka “FIGHT AGAINST COVID19 Group”.
Ka jingdon jong kane ha kynhun ha shnong ka long kaba donkam ha kum kine ki por ba mynta khnang ba ki paitbah ha shnong kin nym shim sting ha kaba iadei bad kane ka khlam. Ki bynta ba kane ka kynhun ka la pyntreikam ka long ban pynsngewthuh ia ki nongshong shnong ba kin long kiba shim khia ban iada ialade na kane ka khlam da kaba bud ryntih ia ki kyndon ba ai ka Sorkar. Ki mat ba ki ju ia kren ka long ban lehkhuid ia lade, ban sait bha ia ki kti man la ka por, ban bam ki jngbam batei met bad ym dei ban ktah ia ka dur khmat da ka kti bad ban jngai na ki briew kumba 2 meter iwei na iwei pat.
Ki la mana pyrshah ban don ka jingiarung bad leit kai ha ka ing ki paramarjan ne bahaiing hynrei ban shong khop ha la iing bad lada ki leit ruh, satang lada ki donkam eh lane donkam kyrkieh. Haba iadei bad ki dukan shnong, la mana pyrshah ia ki khyllung bad ki tymmen ba kin leit dukan bad ba ki dei ban phah da kiba heh. Ha kawei ka dukan shnong, la shah tang ar ngut ban ieng ban ap la la pali. La mana ia ki trai dukan ruh ba kim dei ban ai jingthied tang ha iwei I nongshong shnong hynrei ban peit ba ka mar bam kan dap lang ia kiwei ruh. Ha kaba iadei bad ka jingtong um na ki kor ruh ym shah ban ia lum lymbrum, ki briew hynrei ki dei bud ia ka kyndon ban jngai 2 meter na u wei pat.
Lada don ba pang bad shitom, dei ban iathuh ha ki volunteer bad ban pynbeit ban leit shim dawai tang na PHC shuwa bad lada ki doctor ki donkam ban phah sumar ha Smit lane Shillong ki lah ban leit hynrei katba dang lah ha PHC, ka bha ban leh shuwa ha PHC. La khang ia ki kali ha shnong ruh ban iaid laitluid bad kane ka long bad ka jingiasngewthuh jingmut bad ki trai kali lane nongñiah kali.
Ngi ngeit ba ka Nohron ka long ka nuksa babha ia kiwei ruh ki shnong. Lada baroh ki nongialam shnong ki shim khia kumne bad ruh ki nongshong shnong, ngi ngeit ba ngin lah ban ialeh pyrshah ia ka jingpriang une u khñiang jingpang COVID-19.
