Haka ba iadei bad ka jingrakhe sngi kyrpang jongki Riewlum, ka NESFAS ka lah plie pyrda iaka ‘Mei Ramew State Agroecology Co-operative Society’ haka 9 tarik u Nailar, 2024 ha Shillong.
I Bah R.Rymbai, i Deputy Registrar jong ka Cooperative Society, jong ka sorkar Meghalaya i ba dei ruh i kongsan ha kane ka jingrakhe i lah shim iaka bynta ha ka ban plie pyrda iakane ka society.
Ha kane ka jingrakhe ka NESFAS ka lah pynlong ruh iaka iew jong ki nongrep haka ban pyni nam bad ban die iaki mar rep ha ryngkat ka jingshet tynrai na ki shnong ba lah ia don bynta lang bad kane ka seng.
I Bah Shaiphar Dohling i ba dei i Chairperson jong ka Mei Ramew State Agroecology Co-operative Society i lah ai iaka kyntien Lamphrang da ka ba ong, “Lah seng kyrpang iakane ka Society ban kyntiew iaka ioh ka kot bad ban pynbha shuh shuh iaka jingiadei bad ki para shnong ha ki por ki ban dang wan bad ban trei nabynta ban pynbha iaka mei mariang.”
Hadien kane I Bah Nestar Kharmawphlang i lah pashat katto katne ki kyntien ba kane ka Society ka thmu ban kyrshan ia ka ioh ka kot ha ki shnong da kaba ai iaki jinghikai bapher bapher bad ban pynshlur bad ai mynsiem ia ki nongshong shnong ban shim da ki rukom rep ba pynneh pynsah ia ka mariang bad kiwei de ki jait kam. 
“Ka Mei Ramew State Agroecology Co-operative Society ka thmu ban wanrah ia ka jingkylla ba skhem da kaba kyrshan bad kyntiew ia ki riewlum. Ka NESFAS ka buh ia ka jingmut Mei Ramew ka ba mut ka Mei Mariang bad kane ka dei ka jingkular jong ka NESFAS ha ka thong ban burom bad iada ia ka Mei Mariang.”, lah kynthoh I Bah Nestar.
I Director jong NESFAS, i bah Pius Ranee, i lah pyntip shaphang ka projek ba lah pyntyllun da ka NESFAS ka ba iadei bad ka jjinglum jingtip lyngba ka TAPE kum ba lah pynbit pynbiang da ka FAO-UN. “Ka jingmih halor jong ka jingwad jingtip lyngba ka TAPE study ka Pyni bad ai jingmut ba ka dor jong ka jing ia sam jingtip bad jing shimkhia ba lah pynsuh thied ha ka liang ka synshar ka khadar kan iarap iaka pyrthei hi baroh ka wei ban ialeh pyrshah iaki jingeh halor ka spah mariang bad ka imlang sahlang ka ba sdang ban don ha kine ki por ba mynta. Ngi kum ka NESFAS ngi ia trei shitom da ka jing kyrmen ba ka ne kan long ka nuksa sha kiwei pat ki shnong.” la bynrap i Bah Pius. 
Ha kane ka jing plie pyrda ki nongwan ia shimbynta baroh ki la lah ban iohi bad sngew iaki jait jingshad bad jingrwai ba lah pynkhreh da ki kynhun na ki shnong.
I kongsan jong kane ka sngi kata I Bah. R. Rymbai, ha ka jingkren jong i i lah bynrap, ba kane ka jing plie pyrda ba thymmai jong ka Co-operative society ka dei ka ba kyrpang ba ka don ka jing iadei ba khraw bad ka rep ka riang bad ka bam ka dih tynrai, I lah ai khublei na ka bynta ka jingkiew stet ha ka liang ka kam. I lah ban ruh halor ka jingsdang ka ba shit rhem jong ka society bad sam iakane ka jingkyrmen ba ka lah ban nang iar ha ryngkat ka jing ia trei lang jong iwei pa iwei i shnong ha ki snem ban wan.
Ka jingplie pyrda ba thymmai jong ka Cooperative Society ka kynthup ia ki 19 tylli ki kynhun jong ki Primary Cooperatives na ki 19 tylli ki shnong. Ka Society ka la pynkhreh nabynta ki kynhun jong ka Primary Cooperatives ban ai jinghikai ha lor ki mat trei kam ba pher ba pher kat kum ka jingdonkam jong ka Co-operatives. Kum shibynta jong ka mat treikam ka Co-operative a lah ia snoh kti lang bad ka SIRD bad BRDC.
Hadien ka jingplie pyrda jong ka Cooperative Society, la pyn bud sa ka iew jong ki nongrep haka ba kine ki primary cooperatives jong ka society ki lah pyn i nam iaki mar rep bad bam tynrai jong ki. Ka iew jong ki Nongrep ka dei ka kam ba ju pyntyllun na ka por sha ka por ba lah pyniaid da ka seng NESFAS na bynta ki nongrep na kylleng ka jaka.
I Kong Bisikrin Marwein, member, Cooperative society, I ong, “Ka jingthmu jong ngi lyngba kane ka Society kadei ba ngin ym pynsep ei, bad ba ngin wad ki lad ki lynti ban ioh jinghikai bapher bapher. Lyngba ka ne ka jingsdang kaba rit, ngi kwah ba ngin nang kiew shuh shuh sha khmat.”
