SHA RYNSAN PYRTHEI, RAH BUROM KA NESFAS IA KI JINGBAM TYNRAI BA KYNTHUP HA KI JA SKUL

Rome Jymmang 28 2026: Ka seng NESFAS kala shah khot sngewbha ha ka IFAD, Rome lyngba ka tnat jong ka Indigenous Peoples Assistance Facility (IPAF) ban pynpaw ha ka rynsan pyrthei ia ka jingtrei ban tei ia ka koit ka khiah ki khynnah lyngba ka jingai bam ja sngi ha ki skul da kaba kynthup lang ia ki Jingbam tynrai. Ia kane la ioh ban pyni nam ha ka Rome Nutrition  Week (Taiew ba rakhe ia ki Jingbam Teimet) kaba la long naduh 25-28 tarik Jymmang,2026 ha ka shlem treikam jong ka FAO, Rome. 

Ia ka NESFAS, la mihkhmat da U Bah Pius Ranee, Executive Director bad U Bah Phrang Roy, Nongseng ka NESFAS. 

Kum ban shu pynkynmaw hangne, ba ha u snem 2015 ka dei ka NESFAS kaba wanrah ia ka Indigenous Terra Madre (ITM) ha Mawphlang. Hashwa ban pynlong ïa kane ka jingïalang, ka NESFAS ka la wad bniah ruh shaphang ki jingbam teimet lyngba ka jingiarap jong ka McGill University, Canada, bad ka National Institute of Nutrition Hyderabad. Lyngba kane ka jingwadbniah, la lap bad shem ba ka jingduna jong ki jingbam teimet ha ki khynnah skul ka long haduh 31% ha kito ki khynnah kiba duna ka jingkhiah bad 57% ki la raikhoh palat, wat hapdeng ka jingdon bun ki spah mariang. 

Dei halor kane ka nongrim, ka NESFAS ka la pyrshang ban trei borbah ryngkat ki shnong ki thaw khamtam ki kmie ki kpa bad ki nonghikai ban pyrshang ban kynthup ia ki jingbam kiba mih na ka shnong lajong ha ka bamja sngi ha ki skul. Ia kane ka kam la pynjanai da ka jingiatreilang bad ki kynhun bapher bapher bad da kaba pyndonkam ia ki iktiar kum ka IFAD Digital Tool Box bad ki 10 Tylli ki thup jingbam ba hikai da ka FAO.

Ia kane ka kam la sdang ha u snem 2022 ha ki 11 tylli ki skul lyngba ka jingbei tyngka jong ka The Indigenous Partership, Rome. Mynta kane ka kam kala saphriang sha 26 tylli ki skul bad palat 2000 ngut ki khynnah kila ioh shibun ki jingmyntoi da kaba ioh ia ka bam kaba tei met. Ka bynta kaba kongsan jong kane ka rukom treikam ka long ka jingïasoh lang ïa ki jingbam kiba na khlaw, khamtam ki jhur sla jyrngam, hapoh ki jingïabam.

Haba ai ia ka jingkren ha ka ‘Nutrition Week’ kaba long ha Rome, u Bah Pius Ranee, ula ban khia ia kane ka phang ban pynpaw ka jingsngewkmen kaba khraw ban iohi ba kane ka rukom ai bam ja sngi ia ki khynnah skul ka iaid bha na ka jingsnohkti jong ki kmie ki kpa, ki nonghikai, ki shnong bad khamtam ki nongrep. Ki nongrep ki la iohlad ruh ban die ia ki marbam tynrai ha ki skul bad kaba sngewtynnat shuh shuh ka long ba ki kmie ki kpa ki noh synniang da ki jingbam na kper na ka bynta ka jingmyntoi ki khun bad ki ksiew lajong. 

Ban pynthikna shuh shuh halor kane, ka NESFAS kala pyrshang ruh ban wadbniah (Nutritional analysis) halor ki jhur khlaw bad la shem ba ki don ia kata ka bor jingbam ka ban kyntiew ia ka koit ka khiah khamtam haba iadei bad ka jingduna snam. 

Haba kren pynkut, U Bah Pius Ranee, u pynpaw ruh ka jingangnud ba ka NESFAS ka don ka jingthrang ban pynphriang ia kane kam ha baroh kawei ka jylla lyngba ka jingiasnohkti lang bad ka imlang sahlang ryngkat ki tnat bapher jong ka Sorkar bad ki kynhun kiba don kajuh ka thong ban kyntiew ia ka koit ka khiah ki khynnah.

Ia kane ka jingialang la pyniaid da ka H.E. Elissa A. Golberg, Ambassador bad Permanent Representative jong ka Canada sha ka Food and Agriculture Agencies  ha U.N.